🛑 कामात ‘खोडसाळपणा’ की गुन्हा?

प्रिन्सकुमार मृत्यू प्रकरणातील आरोपीला मिळाला जामीन!

Last updated Jul 4, 2025

🛑 कामात ‘खोडसाळपणा’ की गुन्हा? प्रिन्सकुमार मृत्यू प्रकरणातील आरोपीला मिळाला जामीन!

अहिल्यानगर | प्रतिनिधी
एमआयडीसीमधील क्लासिक व्हील कंपनीत खोडसाळपणाची हद्द पार करणारी धक्कादायक घटना घडली होती. कामाच्या वेळी मित्राने एअर प्रेशर मशीनने गुदद्वारात हवा भरल्यामुळे गंभीर दुखापतीतून प्रिन्सकुमार या तरुणाचा मृत्यू झाला होता. या प्रकरणात अटकेत असलेल्या आरोपी रोशनराजला अखेर उच्च न्यायालयाने जामीन मंजूर केला आहे.

नेमकी काय झाली होती घटना?
7 सप्टेंबर 2024 रोजी प्रिन्सकुमार कंपनीतील फिटिंग लाइनवर काम करत असताना त्याचे सहकारी रोशनराज व दीपक सिंग यांनी एअर प्रेशर मशीनने गुदद्वारात हवा भरल्याचा आरोप आहे. त्यानंतर प्रिन्सकुमार जोरात वेदनेने ओरडत जमिनीवर कोसळला. काही वेळातच तो बेशुद्ध झाला आणि हॉस्पिटलमध्ये मृत घोषित करण्यात आला.

पोलीस कारवाई व न्यायालयीन प्रक्रिया:
एमआयडीसी पोलिसांनी तत्काळ गुन्हा दाखल करून आरोपींना अटक केली. सत्र न्यायालयात जामीन फेटाळल्यानंतर आरोपीने औरंगाबाद खंडपीठात अपील केले.

उच्च न्यायालयाचा निरीक्षण:
न्यायालयाने दिलेल्या निर्णयात स्पष्ट केले की, “ही घटना जाणीवपूर्वक घडली आहे, असे प्रथमदर्शनी वाटत नाही. ती खोडसाळपणातून झालेली कृती दिसते.” यावर आधारित आरोपी रोशनराजला 50,000 रुपये जातमुचलक्यावर जामीन मंजूर करण्यात आला.

कोणत्या कलमांतर्गत गुन्हा?
या प्रकरणात आरोपींवर भादंवि कलम 105, 125, 125(अ), 125(ब) अंतर्गत गुन्हा दाखल आहे.

सावधगिरीचा इशारा!
या प्रकारामुळे कामाच्या ठिकाणी ‘मजेत केली जाणारी खोडसाळपणा’ किती धोकादायक ठरू शकते, याचे भयावह उदाहरण समोर आले आहे.