बीडमध्ये पारधी समाजावर अन्यायाचा कळस!

बीड जिल्ह्यातील केज तालुक्यातील केवड गावात घडलेली घटना ऐकून प्रत्येकाच्या अंगावर शहारे येतात . आदिवासी पारधी समाजातील काळे कुटुंब सावकारांच्या अवैध जाळ्यात सापडून अक्षरशः रस्त्यावर आले आहे.

काय नेमकं घडलं
काळे कुटुंब आपल्या वडिलोपार्जित जमिनीवर ऊसतोड मजुरी करून कसाबसा उदरनिर्वाह करत होतं . पण कुटुंबातील छाया काळे यांना ब्रेस्ट कॅन्सर झाला. उपचारासाठी त्यांनी सावकार सुग्रीव सपाटे व त्यांचा मुलगा रत्नाकर सपाटे यांच्याकडून १ लाख २५ हजार रुपये उसने घेतले .

पण इथेच झाला सगळ्यात मोठा घोटाळा —
अशिक्षितपणाचा गैरफायदा घेत सावकारांनी त्यांच्याकडून जमिनीची रजिस्ट्री स्वतःच्या नावावर करून घेतली. आणि नंतर उलटपक्षी कुटुंबावरच अतिक्रमणाचा खोटा गुन्हा दाखल केला.

प्रशासनाने पोलीस बंदोबस्तात JCB ने त्यांचे कच्चे घर उद्ध्वस्त केले .
त्यामुळे काळे कुटुंब अक्षरशः बेघर झाले .

कायमस्वरूपी भूमिहीन झालेलं हे कुटुंब चार दिवस उपाशीपोटी राहून, भीक मागून जमवलेल्या पैशांतून नागपूरला पोहोचलं . त्यांनी सामाजिक कार्यकर्ते अनिल पवार यांच्या मदतीने मुख्यमंत्री सचिवालयात सहसचिव आशा पठाण (IAS) यांची भेट घेतली.

तिथे त्यांनी आर्त हाक दिली –
“आमची जमीन परत द्या! आम्ही दारोदारी भटकत आहोत, जीवाला धोका आहे!”

आशा पठाण यांनी तात्काळ बीडच्या जिल्हाधिकाऱ्यांना आणि पोलीस अधीक्षकांना आदेश दिले की सावकारावर तातडीने कारवाई करून ७ दिवसांत अहवाल सादर करावा.

दरम्यान, चांप्याचे माजी सरपंच अतिश पवार यांनी रात्री उशिरा पुलाखाली थंडीने थरथरणाऱ्या या कुटुंबाला आपल्या घरी आणलं .

यानंतर हे प्रकरण महाराष्ट्र राज्य अनुसूचित जाती-जमाती आयोगापर्यंत पोहोचलं. उपाध्यक्ष अॅड. धर्मपाल मेश्राम यांनी कडक कारवाईचे आश्वासन दिले आहे .

पीडित कुटुंबाचं ठाम मत –
“मुख्यमंत्री देवेंद्र फडणवीस, महसूल मंत्री चंद्रशेखर बावनकुळे आणि आयोगाचे उपाध्यक्ष धर्मपाल मेश्राम यांना भेटल्याशिवाय आम्ही परत बीडला जाणार नाही!”

आता हे प्रकरण थेट मुंबईपर्यंत पोहोचले असून, प्रशासनाने सावकारावर काय कारवाई केली जाते याकडे संपूर्ण पारधी समाजाचे लक्ष लागले आहे .

---

हा प्रकार म्हणजे समाजातील अशिक्षितपणाचा गैरफायदा घेऊन कसे निरपराध कुटुंब उद्ध्वस्त होऊ शकते याचं जिवंत उदाहरण आहे.
सावकारशाही संपवण्यासाठी कठोर कायदेशीर पावले उचलण्याची मागणी जोर धरतेय!

तुमच्या प्रतिक्रिया नक्की द्या –
अशिक्षित गरीबांचा अन्याय होतोय, हे थांबवायला हवं का?
सावकारशाही संपवण्यासाठी कठोर कायदे हवेत का?

#Beed #PardhiSamaj #Injustice #MetroNews #Viral