नेप्तीत भटके-विमुक्त दिन उत्साहात साजरा – गावातच दाखले वाटप, लाभार्थ्यांच्या चेहऱ्यावर हास्य!

अहिल्यानगर जिल्ह्यातील नेप्ती गावात काल (31 ऑगस्ट) भटक्या-विमुक्त समाजाचा भटके-विमुक्त दिन मोठ्या उत्साहात साजरा करण्यात आला.
मंडळ अधिकारी कार्यालय, नेप्ती यांच्या वतीने आणि मा. उपविभागीय अधिकारी श्री. सुधीर पाटील व तहसीलदार श्री. संजय शिंदे यांच्या मार्गदर्शनाखाली हा कार्यक्रम रंगला.

कार्यक्रमाची खासियत म्हणजे – समाजातील लाभार्थ्यांना जात दाखले, उत्पन्न दाखले व इतर आवश्यक दाखले गावातच वाटप करण्यात आले. यामुळे नागरिकांचा वेळ, खर्च आणि दगदग वाचली. ग्रामस्थांनी समाधानाचा श्वास घेत “शासन खरंच आपल्या दारी आलंय! ” अशी भावना व्यक्त केली.

या सोहळ्याला गावातील मान्यवर आणि शेकडो ग्रामस्थ मोठ्या संख्येने उपस्थित होते. सरपंच संजय जपकर, मंडळ अधिकारी प्रताप कळसे, सामाजिक कार्यकर्ते रामदास फुले, माजी संचालक वसंत पवार, व्हाईस चेअरमन सादिक पवार, सोसायटीचे संचालक जालिंदर शिंदे, सुरेश कदम, महेंद्र चौगुले, भूषण पवार, सचिन पवार, शरद पवार, दत्तू थोरात, नितीन पवार तसेच अनेक ग्रामस्थांनी उत्साहाने सहभाग नोंदवला.

यावेळी मंडळ अधिकारी प्रताप कळसे यांनी सांगितलं की –
“1871 मध्ये ब्रिटिशांनी ‘क्रिमिनल ट्रायब ॲक्ट’ करून भटक्या समाजावर अन्यायकारी शिक्कामोर्तब लादलं होतं. मात्र, स्वातंत्र्यानंतर 31 ऑगस्ट 1952 रोजी शासनाने हा कायदा रद्द केला. त्यानंतर दरवर्षी 31 ऑगस्ट हा दिवस भटके-विमुक्त दिन म्हणून साजरा केला जातो. हा दिवस समाजाला त्यांच्या अधिकारांविषयी जागरूक करतो आणि सामाजिक न्यायाचा संदेश देतो.”

सामाजिक कार्यकर्ते रामदास फुले म्हणाले –
“हा दिवस म्हणजे केवळ साजरा करण्याचा नाही, तर कृतज्ञता व्यक्त करण्याचा दिवस आहे. या समाजाने स्वातंत्र्यलढ्यात आणि छत्रपती शिवरायांच्या स्वराज्य स्थापनेत मोठं योगदान दिलंय. आज दाखल्यांसाठी स्वतंत्र समिती स्थापन करून भटक्या-विमुक्त समाजाला न्याय मिळवून दिल्याबद्दल आम्ही शासनाचे आभारी आहोत.”

गावातच दाखले मिळाल्यामुळे लाभार्थ्यांच्या चेहऱ्यावर आनंद झळकला. पूर्वी यासाठी तालुका किंवा जिल्हा पातळीवर जावं लागायचं, पण आता गावातच सुविधा मिळाल्याने ग्रामस्थांनी महसूल प्रशासनाचं कौतुक केलं.

हा कार्यक्रम केवळ दाखले वाटपापुरता मर्यादित नव्हता, तर समाजातील लोकांमध्ये अधिकारांची जागृती, इतिहासाची जाण आणि सामाजिक न्यायाचा संदेश पोहोचवणारा ठरला.

#MetroNews #BhatujVimuktDin #Ahilyanagar #SocialJustice #ShasanApalyaDari