कापूरवाडी तलाव धोक्याच्या छायेत!
नागरदेवळे परिसरात ग्रामस्थांचा प्रचंड संताप – तातडीने स्ट्रक्चरल ऑडिट करा!

अहिल्यानगर तालुक्यातील मौजे नागरदेवळे परिसरात भीतीचे सावट पसरले आहे!
मुसळधार पावसामुळे कापूरवाडी तलाव तुडुंब भरून धोकादायक स्थितीत आला आहे. तलावाच्या बांधावर मोठ्या प्रमाणात झाडे-झुडपे , बाभळी वाढल्या आहेत आणि भिंतीतून पाणी पाझरत असल्यामुळे मोठ्या दुर्घटनेची भीती ग्रामस्थ व्यक्त करत आहेत.

---

ग्रामस्थांची थेट मागणी – “तातडीने ऑडिट व स्वच्छता करा!”

खासदार निलेश लंके यांनी या गंभीर परिस्थितीकडे जिल्हा प्रशासनाचे लक्ष वेधले आहे. माजी जिल्हा परिषद सदस्य शरद झोडगे यांच्या मार्गदर्शनाखाली स्थानिक ग्रामस्थ सुशिल कदम व निखिल शेलार यांनी अप्पर जिल्हाधिकारी शैलेश हिंगे यांना निवेदन दिले.

या वेळी सुशिल कदम, निखिल शेलार, सागर खरपुडे, सागर चाबुकस्वार, मुकेश झोडगे, राजेश धाडगे, मोहसीन पठाण, समीर पठाण आदी ग्रामस्थ मोठ्या संख्येने उपस्थित होते.

---

मुसळधार पावसाचा तडाखा – नागरदेवळेचे जगणेच धोक्यात!

गेल्या आठवडाभरात तालुक्यात मुसळधार पाऊस झाला आहे. सर्व नाले, ओढे आणि बंधारे तुडुंब भरले आहेत. कापूरवाडी तलावही पूर्ण क्षमतेने भरल्यामुळे गेल्या दोन दिवसांपासून सांडावरून मोठ्या प्रमाणात पाणी वाहत आहे.

यामुळे नागरदेवळे गावाकडे जाणारे अनेक पूल वाहून गेले, संपर्क तुटला आणि गावकरी पूर्णपणे अलगद झाले.

तलाव लष्करी हद्दीत असल्याने अनेक वर्षांपासून गाळ उपसा झालेला नाही. त्यामुळे तलावातील पाण्याचा दाब प्रचंड वाढला असून धोक्याची घंटा वाजू लागली आहे.

---

भिंतीला भगदाड पडल्यास थेट आपत्ती!

ग्रामस्थांनी प्रशासनाला इशारा दिला आहे की, तलावाच्या भिंतीला भगदाड पडल्यास –
नागरदेवळे गावठाण,
पाखरे मळा, पानमळकर मळा, पादीर मळा, बिने मळा, लोंढे मळा, खरपुडे वस्ती,
तसेच भिंगारलगतचा मोठा भाग

थेट धोक्यात येईल. प्रचंड प्रमाणात पाणी बाहेर पडल्यास जीवितहानीसोबतच मालमत्तेचे प्रचंड नुकसान होण्याची शक्यता आहे.

---

ग्रामस्थांचा आवाज – “उद्या उशीर होईल!”

ग्रामस्थांनी स्पष्टपणे मागणी केली आहे की –
कापूरवाडी तलावाचे स्ट्रक्चरल ऑडिट तातडीने करण्यात यावे.
तलावाच्या बांधावरील झाडे-झुडपे आणि गवताची तातडीने स्वच्छता करावी.
पाऊस थांबल्यानंतर आणि पाणी कमी झाल्यावर तलावातील गाळ उपसा करण्याचा ठोस निर्णय घ्यावा.
ग्रामस्थ, लष्करी अधिकारी आणि जिल्हाधिकारी यांच्या संयुक्त बैठकीत पुढील उपाययोजना ठरवाव्यात.

“ही वेळ दुर्लक्ष करण्याची नाही, आज कारवाई झाली नाही तर उद्या प्रचंड संकट कोसळेल,” असा थेट इशारा ग्रामस्थांनी प्रशासनाला दिला आहे.

---

सोशल मीडियावर संतापाचा उद्रेक!

कापूरवाडी तलावाच्या धोकादायक परिस्थितीची माहिती सोशल मीडियावर वाऱ्यासारखी पसरतेय .
तरुणांनी #SaveNagardeole #KapoorwadiLake #MetroNews या हॅशटॅग्ससह प्रशासनाला जागं करण्यासाठी पोस्ट्स आणि व्हिडिओ शेअर करण्यास सुरुवात केली आहे.

---

Metro News Update

कापूरवाडी तलावाच्या भिंतीतून पाणी पाझरणं ही एक साधी बाब नाही. ही संपूर्ण नागरदेवळे गावाच्या सुरक्षिततेशी संबंधित बाब आहे. प्रशासनाने याकडे दुर्लक्ष केल्यास मोठा मानवी व आर्थिक संहार होऊ शकतो.

आता सगळ्यांच्या नजरा जिल्हा प्रशासनाकडे लागल्या आहेत –
ते तातडीने कारवाई करतील का?
की पुन्हा एकदा नागरिकांच्या जिवाशी खेळ होईल?