पत्रकाराला धमकी – आरोपीवर SP घार्गे यांचा कठोर इशारा! पत्रकारांसोबत पोलीस प्रशासन उभं

अहिल्यानगर जिल्ह्यात पुन्हा एकदा पत्रकार सुरक्षेचा मुद्दा चर्चेत आला आहे. श्रीरामपूर येथील ज्येष्ठ पत्रकार व दै. जयबाबाचे संपादक बाळासाहेब शंकरराव आगे यांना एका व्यक्तीने सोशल मीडियावरून जीवे मारण्याची धमकी दिली .
ही धमकी केवळ एका पत्रकारालाच नाही तर पत्रकारितेच्या स्वातंत्र्यालाच धक्का देणारी आहे, असे मत पत्रकार संघटनांनी मांडले आहे.

---

प्रकरण नेमकं काय?

श्रीरामपूर पोलिस ठाण्याच्या हद्दीत काही दिवसांपूर्वी नशेच्या इंजेक्शनसह एका महिलेला अटक करण्यात आली होती . या संदर्भातील बातमी जयबाबा दैनिकात प्रकाशित झाली होती, तसेच पोलीस उपाधीक्षकांचा व्हिडिओही पोर्टलवर आला होता. त्यात आरोपी गणेश मुंडे याचे नाव आल्यानंतर त्याने थेट संपादक बाळासाहेब आगे यांना इंस्टाग्रामवरून ‘वृत्त डिलीट कर नाहीतर तुला डिलीट करतो’ अशी धमकी दिली.

पत्रकाराने समाजातील वास्तव आणि पोलिसांनी दिलेली माहिती प्रसिद्ध केली, आणि त्यावरूनच जीवे मारण्याची धमकी येते, हा प्रकार अत्यंत गंभीर असल्याचे पत्रकारांनी स्पष्ट केले आहे.

---

पत्रकार परिषदेची धाव पोलिसांकडे

या घटनेच्या पार्श्वभूमीवर मराठी पत्रकार परिषदेचे पदाधिकारी व शहरातील अनेक पत्रकारांनी नगरचे पोलिस अधीक्षक सोमनाथ घार्गे यांना निवेदन दिले.
या निवेदनात आरोपीला तातडीने अटक करावी, त्याच्यावर कठोर कारवाई व्हावी आणि बाळासाहेब आगे यांना पोलीस संरक्षण द्यावे अशी मागणी करण्यात आली.

निवेदन देणाऱ्यांमध्ये राज्य कोषाध्यक्ष मन्सूरभाई शेख, जिल्हाध्यक्ष सूर्यकांत नेटके, संजयकुमार पाठक, अन्सार सय्यद, गिरीष रासकर, अमित आवारी, प्रल्हाद एडके, प्रसाद शिंदे, आदील शेख, रविंद्र कदम, गोरख शिंदे, नावेद शेख यांचा समावेश होता.

---

SP सोमनाथ घार्गे यांची प्रतिक्रिया

पत्रकारांना दिलेल्या आश्वासनात SP सोमनाथ घार्गे यांनी स्पष्ट केले की :

• आरोपी गुन्हेगार वृत्तीचा आहे, त्याचा शोध घेतला जात आहे.

• गुन्हे अन्वेषण विभागालाही या प्रकरणात गुंतवण्यात आले आहे.

• आरोपीला लवकरच अटक होईल आणि त्याच्यावर कठोर कारवाई केली जाईल.

---

पत्रकार एकत्र, धमकीला ठाम उत्तर!

पत्रकारांवर होणाऱ्या धमक्या, दडपशाही आणि हल्ल्यांविरुद्ध पत्रकार समुदाय एकत्र येत आहे.
बाळासाहेब आगे यांना मिळालेली धमकी ही केवळ व्यक्तीगत नाही, तर पत्रकारितेच्या स्वातंत्र्यावर केलेला हल्ला आहे.

मेट्रो न्यूज पोर्टल आपल्या वाचकांना आवाहन करतं पत्रकार सुरक्षेबाबत आपण सर्वांनी जागरूक राहायला हवं.
“पत्रकार जिवंत राहिला तरच सत्य जगासमोर येईल!”