श्रीगोंद्यात कायद्याचा गडगडाट! पोलिसांचा वचक संपतोय का? 

 श्रीगोंद्यात कायद्याचा गडगडाट! पोलिसांचा वचक संपतोय का? 

श्रीगोंदा तालुक्यात गुन्हेगारी अक्षरशः बिनधास्त बहरतेय! खून, दरोडे, चोऱ्या, छेडछाड, गँगवॉर – हे आता रोजचं दृश्य झालंय. पण खरा धक्का बसतो तो गुन्ह्यांचा तपासच न होणं – आणि त्यामुळे गुन्हेगारांचे मनोबल दिवसेंदिवस वाढतंय!

 गुन्ह्यांची मालिका सुरूच!
शहरातच नाही, तर ग्रामीण भागातही दिवसाढवळ्या हल्ले, लाठीमार, चोरीसारख्या घटना सर्रास घडत आहेत. चांडगाव, श्रीगोंदा शहर परिसर यासारख्या ठिकाणी चोरट्यांनी पोलिसांना थेट आव्हान दिलंय – पण प्रतिसाद? शून्य.

 अनुभवशून्य तपास यंत्रणा
श्रीगोंद्यातील गुन्हे प्रकटीकरण विभाग पूर्णतः नवीन आणि अनुभव नसलेल्या अधिकाऱ्यांच्या हाती. तालुक्याची पार्श्वभूमी, गुन्हेगारीचं नेटवर्क, स्थानिक खबऱ्यांची माहिती नसल्यामुळे गुन्ह्यांचे धागेदोरेच सापडत नाहीत. अनुभवी अधिकाऱ्यांची नेमणूक ही आता काळाची गरज बनली आहे!

 पोलिस-जनता संवाद हरवला…
पूर्वी अधिकारी जनतेशी संवाद ठेवून काम करायचे, त्यामुळे गुन्ह्यांवर नियंत्रण होतं. पण आता पोलिसांची वागणूकच बदललीय. संवादाचा अभाव, अहंकारयुक्त वागणूक, आणि राजकीय हस्तक्षेप – यामुळे परिस्थिती हाताबाहेर जातेय.

 गस्त नाही, खबऱ्यांशी संपर्क नाही…
रात्रीची गस्त, पथकांचं सक्रिय काम, लोकांशी थेट संवाद, खबऱ्यांचं जाळं – हे सगळं बंद पडल्याने गुन्हेगारीला खतपाणी मिळतंय. पोलिसांचं “संतांची भूमी” हे ओळखच हरवत चाललीय – आता काही जणं श्रीगोंद्यातील पोलीस ठाण्याला “लक्ष्मीभूमी” म्हणतात, हेच पुरेसं सांगतं!

 वेळीच उपाय न घेतल्यास मोठा विस्फोट अटळ!
जर पोलिसांनी तातडीने सुधारणा केल्या नाहीत, तर गुन्हेगारीचा आलेख थांबणार नाही. श्रीगोंद्यात पुन्हा वचक निर्माण करायचा असेल, तर जनतेशी संवाद, अनुभवी अधिकारी आणि सक्रिय तपास व्यवस्था हवीच!

 सवाल स्पष्ट आहे – श्रीगोंद्यात कायद्याचा राज असेल की गुन्हेगारांचा?