राजकारणात धक्का! पुसदमध्ये राष्ट्रवादी काँग्रेस (अजित पवार गट) हादरला — ४३ कार्यकर्त्यांचे एकाच वेळी राजीनामे

 

पुसद शहरातील राजकारणात आज अक्षरशः खळबळ माजली आहे. राष्ट्रवादी काँग्रेस (अजित पवार गट) ला मोठा धक्का बसला असून जिल्हा उपाध्यक्ष पठाण अहमद खान नजीर खान आणि अल्पसंख्याक शहराध्यक्ष नन्हे खान चांद खान यांनी आपापले राजीनामे दिले आहेत. एवढेच नव्हे तर या दोघांचे कट्टर समर्थक असलेल्या तब्बल ४३ कार्यकर्त्यांनी देखील राजीनामे सादर केले आहेत.

स्थानिक स्वराज्य निवडणुकीच्या तोंडावर हा मोठा धक्का!
निवडणुकीच्या अगोदरच इतक्या मोठ्या संख्येने पदाधिकारी आणि कार्यकर्त्यांनी दिलेले राजीनामे हा अजित पवार गटासाठी राजकीय धक्का ठरला आहे. या घटनेमुळे पक्षात एकच गोंधळ उडाला असून विरोधकांमध्ये मात्र आनंदाचे वातावरण आहे.

“मानसन्मान नाही म्हणून राजीनामा दिला!” — पठाण अहमद खान नजीर खान
राजीनामा दिल्यानंतर बोलताना पठाण अहमद खान यांनी सांगितले की, “आम्ही राज्यमंत्री इंद्रनील नाईक यांचे कट्टर समर्थक होतो. त्यांना मत मिळावे म्हणून समाजाच्या विरोधात जाऊन जनतेशी संवाद साधला. पण आमच्या निष्ठेचा सन्मान कधीच झाला नाही. आमच्याशी अपमानास्पद वागणूक मिळाली आणि आमचे नेतेच भेटायला तयार नव्हते. म्हणून आम्ही सामूहिक राजीनामा दिला.”

कार्यकर्त्यांच्या म्हणण्यानुसार, पक्षात काही “खास निकटवर्तीय” लोकांनी राज्यमंत्री आणि सामान्य कार्यकर्त्यांमध्ये अंतर निर्माण केले होते. त्यामुळे तळागाळातील अनेक निष्ठावान कार्यकर्ते असंतुष्ट होते.

२७ ऑक्टोबर रोजी पठाण अहमद खान यांनी जिल्हाध्यक्षांकडे तर ३० ऑक्टोबर रोजी नन्हे खान चांद खान यांनी अल्पसंख्याक जिल्हाध्यक्षांकडे राजीनामा दिला. त्यानंतर दोघांचे ४३ समर्थकांनी देखील शहराध्यक्ष मोहम्मद इरफान फय्याज यांना व्हॉट्सअॅपद्वारे राजीनामा पाठवला.

“इंद्रनील नाईक हे सर्वसामान्यांचे नेते” — शहराध्यक्ष मोहम्मद इरफान फय्याज
या राजीनाम्यांबाबत प्रतिक्रिया देताना शहराध्यक्ष मोहम्मद इरफान फय्याज यांनी स्पष्ट केले की, “राज्यमंत्री इंद्रनील नाईक हे सर्वसामान्यांचे नेते आहेत. ते प्रत्येक कार्यकर्त्याला सोबत घेऊन चालतात. त्यांचा कामाचा व्याप वाढलेला असल्यामुळे वेळेअभावी सर्वांशी थेट संवाद शक्य नसतो. यामुळे काही गैरसमज पसरवले जात आहेत.”

राजकीय समीकरणात बदलाची चाहूल!
या सामूहिक राजीनाम्यांनंतर पुसदच्या राजकारणात नवा भूचाल आलाय. काही कार्यकर्ते विरोधी गटात जाण्याची शक्यता वर्तवली जात आहे. तर काहींनी स्वतंत्र राजकीय संघटनेची तयारीही सुरू केल्याची चर्चा रंगली आहे.

शहरातील वर्तुळांमध्ये सध्या या घटनेची जोरदार चर्चा सुरु आहे — काहींनी याला “बंड” म्हटलं आहे, तर काहींनी “सन्मानाची लढाई” असा उल्लेख केला आहे.

राजकारण तापणार निश्चित!
स्थानिक स्वराज्य निवडणुकीच्या पार्श्वभूमीवर हा राजीनामा प्रकरण पक्षासाठी मोठं डोकेदुखीचं कारण ठरू शकतं. अजित पवार गटाला आता नव्याने संघटन बांधणी करावी लागणार आहे.

#MetroNews #PusadPolitics #NCPUpdate #AjitPawarGroup #PoliticalShock #MaharashtraPolitics #BreakingNews