जामखेड बसस्थानकात वाढता धोका! महिलांची छेडछाड आणि चोरीच्या घटना वाढल्या

जामखेड बसस्थानक आता प्रवाशांसाठी असुरक्षित ठिकाण बनत चालले आहे . गर्दीचा फायदा घेत छेडछाड आणि दागिन्यांच्या चोरीच्या घटना सर्रास घडत आहेत. नुकत्याच घडलेल्या घटनेने याचा मोठा पुरावा मिळाला आहे.

घटना अशी:
२५ ऑगस्ट रोजी पुणे जिल्ह्यातील सुनंदा सुभाष वायकर (वय ४३) या आपल्या नातेवाईकांना सोडण्यासाठी जामखेड एसटी बसस्थानकात आल्या होत्या. सायंकाळी साडेपाचच्या सुमारास गर्दीच्या बसमध्ये पाहुण्यांना चढवताना, एका महिलेने त्यांचा ३० हजार किमतीचा सोन्याचा मंगळसूत्र (५ ग्रॅम वजनाचा) हातचलाखीने चोरला . काही क्षणातच चोरी लक्षात आल्यानंतर वायकर यांनी तत्परतेने प्रतिक्रिया दिली व बस थेट पोलिस ठाण्यात नेली.

पोलिसांनी केलेल्या तपासानंतर, बसमध्ये प्रवास करणारी गवळणबाई फुलचंद काळे (वय ७०, रा. उड्डाणवडगाव, जि. बीड) हिच्याविरोधात गुन्हा नोंदविण्यात आला आहे. आरोपीला पोलिसांनी ताब्यात घेतले असून, पुढील तपास पोलीस निरीक्षक दशरथ चौधरी यांच्या मार्गदर्शनाखाली पोलिस नाईक जितेंद्र सरोदे करत आहेत.

मात्र इथेच प्रश्न संपत नाही! जामखेड बसस्थानकाच्या संथ गतीने सुरू असलेल्या कामामुळे प्रवाशांना उघड्यावर थांबावे लागते. या गोंधळात चोरी आणि महिलांवरील छेडछाडीच्या घटना वाढल्या आहेत. विशेषतः महिला प्रवाशांमध्ये प्रचंड भीतीचे वातावरण आहे .

प्रवाशांची मागणी:

• बसस्थानकात तातडीने CCTV कॅमेरे बसवावेत

• पोलिसांनी नियमित गस्त वाढवावी

• अपूर्ण बसस्थानकाचे काम त्वरित पूर्ण करावे

अन्यथा जामखेड बसस्थानक प्रवाशांसाठी असुरक्षित झोन बनणार, असा इशारा नागरिकांनी दिला आहे.

---

मेट्रो न्यूजचा सवाल:
जामखेडसारख्या तालुक्याच्या मुख्य बसस्थानकावर जर महिला सुरक्षित नसतील, तर ग्रामीण भागातील प्रवाशांचा विश्वास कसा वाढणार?

तुमचे मत काय?
सरकारने प्रवाशांच्या सुरक्षेसाठी तातडीने उपाययोजना करायला हव्यात का?
की लोकांनीच अधिक सावध राहावे?

खाली कमेंट करा आणि ही बातमी जास्तीत जास्त शेअर करा, जेणेकरून प्रशासनाला जाग येईल!

#Jamkhed #BusStand #Chori #Molestation #WomenSafety #MetroNews