🪻 राज्यफुलाची शान… ताम्हण प्रत्येक गावात आणि शाळेत फुललं पाहिजे!

🪻 राज्यफुलाची शान… ताम्हण प्रत्येक गावात आणि शाळेत फुललं पाहिजे!
जय हिंद फाउंडेशनची राज्य सरकारकडे आग्रही मागणी – ‘ताम्हण’साठी जनआंदोलनाची सुरुवात!

नगर (प्रतिनिधी) – “महाराष्ट्राचं अधिकृत फुल असलेलं ताम्हण प्रत्येक शाळा, गाव आणि विद्यार्थ्यांच्या मनात फुललं पाहिजे,” अशी ठाम भूमिका घेत जय हिंद फाऊंडेशनने राज्य सरकारकडे आग्रही मागणी केली आहे. फाऊंडेशनने मुख्यमंत्री, उपमुख्यमंत्री, पर्यावरण मंत्री आणि राज्यपालांना पत्र पाठवून ताम्हणच्या रोपांची मोफत वितरण योजना राबवण्याचे आवाहन केले आहे.

जय हिंद फाऊंडेशनचे अध्यक्ष शिवाजी पालवे यांनी सांगितले की, “ताम्हण हे महाराष्ट्राचं अस्मितेचं प्रतीक आहे. परंतु अजूनही लाखो नागरिकांना त्याची ओळख नाही. त्यामुळे या फुलाचा गौरव जनमानसात पोहोचवण्यासाठी ही मोहिम सुरू केली आहे.”

सध्या फाऊंडेशनच्या माध्यमातून जिल्ह्याच्या विविध भागांत ताम्हण झाडांची लागवड सुरू आहे. मात्र ही चळवळ राज्यभर पोहोचवण्यासाठी शासनाच्या सक्रिय सहभागाची गरज आहे. शाळा, ग्रामपंचायत आणि वनविभागाच्या माध्यमातून ताम्हणच्या रोपांचे मोफत वितरण करावे, अशी मागणी करण्यात आली आहे.

ताम्हण का खास?
हिरव्या पार्श्वभूमीवर उमलणारं जांभळट फुलं, सौंदर्य आणि शांततेचं प्रतीक…
हे फूल केवळ निसर्गरम्य नाही, तर महाराष्ट्राच्या सांस्कृतिक ओळखीचं प्रतीकही आहे. मात्र प्रत्यक्षात ताम्हण झाडं अत्यंत कमी प्रमाणात आढळतात. ही स्थिती बदलण्यासाठी शाळांमध्ये याची लागवड करणे ही काळाची गरज आहे, असेही पालवे यांनी नमूद केले.

फाऊंडेशनच्या पुढाकारानं –
🔹 जिल्ह्यात विविध ठिकाणी वृक्षारोपण
🔹 विद्यार्थ्यांसाठी जागृती उपक्रम
🔹 गावपातळीवर जनजागृती मोहिम
🔹 पर्यावरण संरक्षणासोबत महाराष्ट्र गौरवाचं प्रतिकात्मक अभियान

“आजचं पाऊल, उद्याचं फूल!” या घोषवाक्याने प्रेरित होऊन जय हिंद फाऊंडेशनने एक पर्यावरणीय जनआंदोलन उभं केलं आहे. शासन जर यामध्ये हातभार लावला, तर लवकरच प्रत्येक शाळेत, गावात आणि मनात ताम्हणाचं फूल उमलेल, असा विश्वास फाऊंडेशनने व्यक्त केला आहे.

📢 #ताम्हण_मिशन2025
📷 फोटो अपलोड करा | रोप लावा | महाराष्ट्र फुलवा!
#जय_हिंद_फाऊंडेशन #ताम्हणचे_गौरव #राज्यफुलाची_ओळख #EcoPrideMaharashtra #ताम्हण_मोहिम