“अवयवदान पंधरवडा” ला जोरदार सुरुवात – आरोग्यमंत्र्यांकडून शपथ, जनतेला सहभागाचं आवाहन!

प्रत्येक नागरिकाने या अभियानात सामील होऊन अंगदानाची शपथ घ्यावी.”

Last updated Aug 5, 2025

“अवयवदान पंधरवडा” ला जोरदार सुरुवात – आरोग्यमंत्र्यांकडून शपथ, जनतेला सहभागाचं आवाहन!

मुंबई | ३ ऑगस्ट २०२५ – “अंगदान म्हणजे जीवनदान!” या मंत्राला मूर्त स्वरूप देण्यासाठी महाराष्ट्रात आजपासून “अवयवदान पंधरवडा” ला भव्य सुरुवात झाली आहे. राज्यातील प्रत्येक नागरिकाच्या सहभागातून अवयवदानाबद्दल जनजागृती व्हावी आणि गरजू रुग्णांना नवसंजीवनी मिळावी, यासाठी आरोग्यमंत्री प्रकाश आबिटकर यांनी स्वत: पुढाकार घेत अवयवदानाची शपथ घेतली आहे.

३ ऑगस्ट ते १५ ऑगस्ट या कालावधीत राज्यात अवयवदान जनजागृती उपक्रमांची मालिकाच राबवली जात आहे. शाळा, महाविद्यालये, सामाजिक संस्था, धार्मिक मंडळे, आरोग्य सेवा संस्था आणि स्वयंसेवी संघटनांचा यामध्ये उत्स्फूर्त सहभाग असणार आहे.

या मोहिमेचे उद्दिष्ट केवळ अवयवदानाचे प्रमाण वाढवणे नाही, तर भय, अंधश्रद्धा आणि गैरसमज दूर करून वैज्ञानिक माहिती जनतेपर्यंत पोहोचवणे हे देखील आहे.

आरोग्यमंत्री आबिटकर यांनी सांगितले की, “अवयवदान ही केवळ वैद्यकीय प्रक्रिया नसून, ती एक सामाजिक बांधिलकी आहे. प्रत्येक नागरिकाने या अभियानात सामील होऊन अंगदानाची शपथ घ्यावी.”

या मोहिमेमध्ये ROTTO, SOTTO, ZTCC (मुंबई, पुणे, नागपूर, छत्रपती संभाजीनगर) तसेच विभागीय प्रत्यारोपण समन्वय समित्यांचा सक्रिय सहभाग आहे. राज्याच्या सार्वजनिक आरोग्य विभागाने या अभियानाला अधिक व्यापक आणि लोकाभिमुख बनवण्याचा निर्धार व्यक्त केला आहे.