🔥🎉 पुणेकरांनो, सज्ज व्हा! 🎶💃

“पुणे फेस्टिव्हल” यंदा ३७व्या वर्षात भव्यतेने साजरा होतोय.

Last updated Aug 19, 2025

पुणेकरांनो, सज्ज व्हा!

कला, संस्कृती, संगीत, नृत्य, क्रीडा आणि पर्यटनाचा अनोखा संगम असलेला “पुणे फेस्टिव्हल” यंदा ३७व्या वर्षात भव्यतेने साजरा होतोय.

दिनांक २७ ऑगस्ट ते ६ सप्टेंबर २०२५ या गणेशोत्सव काळात होणाऱ्या या महोत्सवाचं उद्घाटन २९ ऑगस्ट रोजी सायंकाळी ४.३० वाजता श्री गणेश कला-क्रीडा रंगमंच, स्वारगेट येथे होणार आहे. उद्घाटन महाराष्ट्राचे राज्यपाल मा. सी. पी. राधाकृष्णन यांच्या हस्ते होईल.

या वेळी केंद्रीय मंत्री, राज्यातील मान्यवर, खासदार, आमदार, परदेशी पाहुणे आणि विद्यार्थी मोठ्या संख्येने उपस्थित राहणार आहेत.

काय असणार विशेष?

अशोक हांडे प्रस्तुत “आवारा हूँ” – राज कपूर यांच्या चित्रपटांना श्रद्धांजली देणारा गाजलेला प्रयोग!
ऑल इंडिया मुशायरा – देशभरातील नामवंत शायर पुण्यात एकत्र!
डिव्हाइन कॉन्फ्लुएन्स – जपानी नृत्य, तायको ड्रम्स, कथ्थक आणि आंतरराष्ट्रीय नृत्यकला रसिकांसाठी खास!
मराठी कविसंमेलन, हिंदी हास्यकविसंमेलन, संगीत सौभद्र, नारदीय कीर्तन, लावणी आणि बरेच काही!
वारली पेंटिंग्ज, व्यंगचित्र, फोटोग्राफी आणि ऐतिहासिक किल्ल्यांवरील प्रदर्शने!
क्रीडा स्पर्धा – बॉक्सिंग, मल्लखांब, गोल्फ, बुद्धिबळ, स्केटिंग आणि फिटनेस!

या फेस्टिव्हलमध्ये दरवर्षीप्रमाणेच जीवनगौरव पुरस्कार आणि पुणे फेस्टिव्हल अवॉर्ड्स दिले जाणार आहेत. यंदा डॉ. शिवाजीराव कदम, डॉ. पी. ए. इनामदार यांना गौरविण्यात येणार आहे. तसेच डॉ. सतीश आळेकर, क्रिकेटपटू केदार जाधव, ‘महाराष्ट्र केसरी’ पृथ्वीराज मोहोळ यांना विशेष पुरस्कार मिळणार आहे.

१९८९ मध्ये सुरुवात झालेला हा फेस्टिव्हल आज “मदर ऑफ ऑल फेस्टिव्हल्स” म्हणून ओळखला जातो. सुरुवातीपासूनच पं. भीमसेन जोशी अध्यक्ष होते तर हेमामालिनी या फेस्टिव्हलच्या पॅट्रन आहेत.