अहमदनगर कॉलेजच्या विद्यार्थ्यांचा ‘करिअर कट्टा’ उपक्रम !

पूरग्रस्तांसाठी उभा राहिला माणुसकीचा हात!

अहिल्यानगर : भा. पां. हिवाळे शिक्षण संस्थेच्या अहमदनगर महाविद्यालयातील करिअर कट्टा आणि विद्यार्थी विकास मंडळाने पुन्हा एकदा समाजासाठी आदर्श निर्माण केला आहे!  नुकत्याच झालेल्या पूरग्रस्तांच्या मदतीसाठी निधी संकलन फेरीत विद्यार्थ्यांनी, प्राध्यापकांनी आणि नागरिकांनी दाखवलेली उत्स्फूर्त सहभागाची भावना पाहून सर्वजण भारावून गेले! 

या उपक्रमामागचं उद्दिष्ट केवळ आर्थिक मदत नव्हतं, तर पूरग्रस्त विद्यार्थ्यांसाठी शैक्षणिक सहाय्य देण्याचा हा एक प्रेरणादायी प्रयत्न होता.  नुकत्याच झालेल्या राज्यस्तरीय बैठकीत प्राचार्य प्रवर्तक आणि जिल्हा समन्वयकांनी राज्यभरातून करिअर संसदेच्या माध्यमातून निधी उभारून शिक्षणसाहित्य पुरविण्याचा निर्णय घेतला होता.

 विद्यार्थ्यांसाठी तयार होणाऱ्या “स्पेशल एज्युकेशनल किट” मध्ये स्कूल बॅग, वॉटर बॉटल, बॉल पेन पॉकेट, पेन्सिल किट, परीक्षा पॅड फोल्डर आणि नोटबुक्स अशा साहित्याचा समावेश आहे — ज्याची एकूण किंमत सुमारे ₹1008 इतकी आहे. 

या उदात्त कार्याचे नियोजन आणि देखरेख प्राचार्य प्रवर्तक आणि जिल्हा समन्वयक समितीद्वारे राज्य पातळीवर केली जात आहे.

 या मोहिमेला भा. पां. हिवाळे शिक्षण संस्था, उच्च व तंत्र शिक्षण विभाग – महाराष्ट्र राज्य, महाराष्ट्र माहिती तंत्रज्ञान सहाय्यता केंद्र, आणि विद्यार्थी विकास मंडळ यांनी संयुक्तपणे हातभार लावला आहे.

संस्थेचे अध्यक्ष डॉ. आर. जे. बार्नबस, सचिव विशाल बार्नबस, आणि महाराष्ट्र माहिती तंत्रज्ञान सहाय्यता केंद्राचे अध्यक्ष श्री. यशवंत शितोळे यांच्या मार्गदर्शनाखाली हा उपक्रम साकारला गेला.

 महाविद्यालयाचे प्रभारी प्राचार्य डॉ. नोएल पारगे म्हणाले,
“हा उपक्रम केवळ निधी संकलन नाही, तर विद्यार्थ्यांमध्ये आणि समाजात मानवतेची उब, सामाजिक जबाबदारीची भावना आणि सहकार्याची संस्कृती रुजवण्याचा आमचा प्रयत्न आहे. ”

संकलित निधीच्या साहाय्याने शिक्षण साहित्य, आरोग्यसेवा, अन्नधान्य आणि जीवनावश्यक वस्तू पूरग्रस्त नागरिकांना देण्यात येणार आहेत. 

या उपक्रमात उपप्राचार्य दिलीपकुमार भालसिंग, डॉ. सय्यद रज्जाक, प्रो. प्रीतमकुमार बेदरकर, प्रा. सुरेश घुले, अभिजीत कुलकर्णी, प्रा. प्रतुल कसोटे, आणि डॉ. भागवत परकाळ यांची प्रमुख उपस्थिती होती. 

 निधी संकलनासाठी कापड बाजार परिसरात विशेष फेरी आयोजित करण्यात आली, ज्याला व्यापारी वर्ग आणि नागरिकांकडून प्रचंड प्रतिसाद मिळाला!  या फेरीतून तब्बल ₹18,386 इतका निधी संकलित करण्यात आला असून, तो ४ ऑक्टोबर २०२५ रोजी करिअर कट्टा रिलीफ फंडामध्ये जमा करण्यात आला.

 या उपक्रमात डॉ. अनुराधा पाऊलबुद्धे (बाबर) यांचे अर्थशास्त्र विभागातून विशेष सहकार्य लाभले, तर साक्षी मस्के, पूजा शिंदे, मनीषा गोपळे, अंजू विधाते, नम्रता सिंग, आकाश सोनवणे, स्वाती कनोजिया, रोनित मुथा, अर्जुन गहिले आदी विद्यार्थ्यांनी या मोहिमेत सक्रिय सहभाग घेतला.

 फेरीचे यशस्वी आयोजन सुमित कोतकर, यश कच्छवा आणि वसीम शेख यांनी उत्तम नियोजनाने पार पाडले.

 “आजच्या काळात सेल्फीसाठी उभे राहणारे हात, जर मदतीसाठी उभे राहिले — तर समाज बदलतो,” असं अनेकांनी सोशल मीडियावर या उपक्रमाचं कौतुक करताना म्हटलं! 

 अशा विद्यार्थ्यांच्या आणि शिक्षकांच्या समाजसेवेच्या प्रयत्नांमुळेच शिक्षण क्षेत्र फक्त ज्ञानाचा नाही, तर माणुसकीचा दीपस्तंभ बनत आहे!