ब्रेकिंग अपडेट – सांगोला पोलीसांची मोठी धडक कारवाई!

गणेशोत्सव  आणि ईद-ए-मिलाद  सारख्या दोन महत्त्वाच्या सणांच्या पार्श्वभूमीवर सांगोला तालुक्यातील कायदा व सुव्यवस्थेचा प्रश्न गंभीर होऊ नये म्हणून पोलिसांनी एक मोठे पाऊल उचलले आहे.

२७ ऑगस्ट २०२५ रोजी सांगोला पोलीस ठाण्याच्या गुन्हा नोंदींनुसार, काही आरोपींनी गणेश विसर्जन मिरवणुकीदरम्यान दहशत निर्माण केली होती.  फिर्यादीवर गाडीत गुलाल टाकल्यामुळे वाद झाला आणि त्यानंतर आरोपींनी लाथाबुक्यांनी, काठ्यांनी मारहाण करून वातावरणात गोंधळ उडवला. एवढेच नाही तर, दुसऱ्या प्रकरणात मौजे वाकी घेरडी येथे सार्वजनिक गणपती मंडपावरून वाद घालत फिर्यादी आणि त्याच्या नातेवाईकांना मारहाण करण्यात आली. यात दोन समाजामध्ये तणाव निर्माण होऊन कायदा व सुव्यवस्थेला धोका निर्माण झाला होता. 

या सर्व पार्श्वभूमीवर सांगोला पोलीसांनी विशेष प्रस्ताव तयार करून आरोपींना हद्दपार करण्याची मागणी केली. त्यानुसार मा. बी. आर. माळी (उपविभागीय दंडाधिकारी, मंगळवेढा) यांनी भारतीय नागरीक सुरक्षा संहिता २०२३ अंतर्गत आदेश जारी केले आहेत.

 या आदेशानुसार, ९ जणांना (हर्षद दाजी बनसोडे, सोमनाथ शिवाजी बनसोडे, विद्याधर चवानंद बनसोडे, अनिकेत बाबासो बाबरे, सचिन सुरेश प्रक्षाळे, अजित बाजु खांडेकर, ज्ञानेश्वर चंद्रकांत खांडेकर, शस्य आनंदा लबटे, संतोष अंबाजी खांडेकर) २५ ऑगस्ट २०२५ ते ६ जानेवारी २०२५ पर्यंत सांगोला तालुक्यात प्रवेश करण्यास सक्त मनाई करण्यात आली आहे. 

या कारवाईमुळे गणेशोत्सव आणि ईदच्या काळात सांगोला परिसरात शांतता राखली जाणार आहे.  पोलिसांनी नागरिकांना शांततेचे आवाहन केले असून, कोणतीही गडबड करणाऱ्यांवर कठोर कारवाई होईल, असा इशारा दिला आहे. 

 या धडक कारवाईमागे पोलीस अधीक्षक अतुल कुलकर्णी, अपर पोलीस अधीक्षक प्रितम यावलकर, उपविभागीय पोलीस अधिकारी डॉ. बसवराज शिवपुजे यांच्या मार्गदर्शनाखाली पोलीस निरीक्षक विनोद घुगे व त्यांच्या टीमने महत्वाची भूमिका बजावली. 

 सांगोला पोलिसांची ही कारवाई म्हणजेच “सणात उत्साह राहिला पाहिजे पण गोंधळ नको!” याचा परिपूर्ण संदेश 

 आता सांगोल्यातील नागरिकांना मोकळ्या मनाने सण साजरे करण्याचा दिलासा मिळाला आहे.