अहिल्यानगरचा नवा विकास आराखडा सुरू – नागरिकांनाही मिळणार थेट मत देण्याची संधी!

अहिल्यानगरचा नवा विकास आराखडा सुरू – नागरिकांनाही मिळणार थेट मत देण्याची संधी!

अहिल्यानगर :
अहिल्यानगर महानगरपालिकेचा नवीन विकास आराखडा (DP) तयार करण्याचं काम वेगाने सुरू आहे. या कामासाठी राज्य शासनाने नियुक्त केलेल्या नगररचना विभागाच्या डीपी युनिटने विद्यमान जमीन वापर नकाशा तयार केला असून, तो आता नागरिकांना पाहण्यासाठी उपलब्ध करून दिला आहे.

हा नकाशा थेट महानगरपालिका मुख्य प्रशासकीय कार्यालय, विकास योजना विशेष घटक कार्यालय (सावित्रीबाई फुले व्यापारी संकुल, तहसील कार्यालय समोर) तसेच महानगरपालिकेच्या संकेतस्थळावर पाहता येणार आहे.

महत्त्वाचं म्हणजे –
या नकाशामध्ये काही त्रुटी किंवा सुधारणा सुचवायची असल्यास नागरिक थेट महानगरपालिकेशी संपर्क करू शकतात.
नागरिकांनी दिलेल्या सूचना पुढील आराखड्यात विचारात घेतल्या जातील, असं आश्वासन आयुक्त तथा प्रशासक यशवंत डांगे यांनी दिलं आहे.

पार्श्वभूमी :

• अहिल्यानगर महानगरपालिका क्षेत्राचा मूळ विकास आराखडा २००५ मध्ये मंजूर झाला होता.
• वाढीव हद्दीचा विकास आराखडा २०१२ मध्ये मंजूर झाला.
• मात्र आता २०२४ मध्ये सुधारित विकास आराखडा तयार करण्याची प्रक्रिया सुरू झाली आहे.
• १४ ऑगस्ट रोजी नगररचना अधिकाऱ्यांनी नवीन नकाशा महानगरपालिकेकडे सुपूर्द केला.

आयुक्त यशवंत डांगे आणि नगररचना अधिकारी पूनम पंडित यांनी जाहीर केल्यानुसार, हा नकाशा नागरिकांसाठी खुला ठेवण्यात आला आहे.
“अहिल्यानगरच्या भविष्यातील विकास आराखड्यात प्रत्येक नागरिकाचा सहभाग महत्त्वाचा आहे, त्यामुळे सूचना नक्की द्या,” असं आवाहनही करण्यात आलं आहे.

आता खरंच नागरिकांनी पुढे येऊन आपलं मत दिलं तर – रस्ते, शाळा, हॉस्पिटल, गार्डन, हॉटेल्स, रिसॉर्ट्स अशा सुविधांचा भविष्यातील आराखडा अधिक नेमका आणि नागरिकाभिमुख होऊ शकतो.