समाजात खळबळ! कास्ट्राईब कर्मचारी महासंघाचा तीव्र निषेध !

“संविधानावर हल्ला, शांततेवर आघात!”

अहिल्यानगर (प्रतिनिधी) —
अहिल्यानगर शहरात पुन्हा एकदा तणावाचे वातावरण निर्माण झाले आहे!  सर्वोच्च न्यायालयाचे सरन्यायाधीश न्यायमूर्ती भूषण गवई यांच्यावर झालेल्या हल्ल्याचा आणि शहरातील भारतरत्न डॉ. बाबासाहेब आंबेडकर यांच्या बाबतीत आक्षेपार्ह पत्रके फेकण्यात आल्याच्या घटनेचा कास्ट्राईब कर्मचारी महासंघाने जोरदार निषेध नोंदवला आहे.

 या निषेध मोर्चाची सुरुवात मार्केटयार्ड चौकातील डॉ. बाबासाहेब आंबेडकर यांच्या पुतळ्याला पुष्पहार अर्पण करून करण्यात आली. त्यानंतर “संविधानाचा अपमान आम्ही सहन करणार नाही!”  अशा घोषणा देत निदर्शने करण्यात आली.

या आंदोलनात कास्ट्राईबचे राज्याध्यक्ष एन. एम. पवळे, उपमहासचिव निवृत्ती आरु, उपाध्यक्ष वसंत थोरात, संघटक सचिव बुद्धानंद धांडोरे, कार्याध्यक्ष कुंदा क्षेत्रे, सचिव छानराज क्षेत्रे, तसेच नाशिक उपविभागीय अध्यक्ष ना. म. साठे आदी मान्यवर मोठ्या संख्येने सहभागी झाले होते. 

 राज्याध्यक्ष एन. एम. पवळे यांनी पत्रकारांशी बोलताना सांगितले की,

“सर्वोच्च न्यायालयाचे सरन्यायाधीश न्यायमूर्ती भूषण गवई यांच्यावर झालेला हल्ला हा फक्त व्यक्तीवरचा नाही, तर भारतीय संविधानावरचा हल्ला आहे. 
समाजात जाणूनबुजून अशांतता पसरविण्याचा प्रयत्न सुरू आहे.
आता या प्रवृत्तींचा बंदोबस्त करणे आवश्यक आहे!”

पवळे यांनी पुढे सांगितले की, पोलिसांनी केवळ आरोपीला पकडून थांबू नये, तर या कटामागील सूत्रधाराचा शोध घेऊन त्याला कठोर शिक्षा केली पाहिजे. अन्यथा समाजातील शांतता आणि एकोपा धोक्यात येईल. 

 त्यांनी स्पष्ट केले की, “ज्यांनी महामानवांविरुद्ध आक्षेपार्ह वक्तव्ये किंवा पत्रके प्रसिद्ध केली, त्यांना कायद्याने कडक शिक्षा व्हायलाच हवी!
डॉ. बाबासाहेब आंबेडकर यांच्यावर आक्षेपार्ह लिखाण करणाऱ्यांना देशद्रोहाचा गुन्हा दाखल करून वकिली करण्यास कायमस्वरूपी बंदी घालावी!” 

कास्ट्राईब कर्मचारी महासंघाने यावेळी सरन्यायाधीश भूषण गवई यांच्यावर बूट फेकणारे ॲड. राकेश किशोर तीवारी यांच्या विरोधात तीव्र कारवाईची मागणी केली आहे. त्यांनी केंद्र आणि राज्य सरकारला निवेदन देऊन,

“देशात कोणत्याही न्यायालयात या व्यक्तीस वकिली करण्यास परवानगी देऊ नये आणि त्याची वकिलीची सनद कायमस्वरूपी रद्द करण्यात यावी,” अशी ठाम मागणी केली. 

 या आंदोलनामुळे शहरात तणावाचे वातावरण निर्माण झाले असून, समाजविघातक प्रवृत्तीच्या विरोधात ठोस भूमिका घेण्याची मागणी सर्वत्र जोर धरू लागली आहे.

 अखेर कास्ट्राईब कर्मचारी महासंघाच्या घोषणांनी अहिल्यानगरच्या रस्त्यांवर एकच संदेश घुमला —

“संविधान आमचं धर्मग्रंथ आहे, त्याचा अपमान करणाऱ्यांना क्षमा नाही!”