नगरच्या फुटबॉल इतिहासात नवा अध्याय!

नगरच्या फुटबॉल इतिहासात नवा अध्याय!

३ खेळाडू थेट राष्ट्रीय कॅम्पसाठी सिलेक्ट!
महाराष्ट्र टीमसाठी मुंबईत मिळणार स्पेशल ट्रेनिंग

अहिल्यानगर | मेट्रो न्यूज प्रतिनिधी

नगर जिल्ह्यातील फुटबॉल रसिकांसाठी अभिमानाची बातमी! कृष्णराज टेमकर, भानुदास चंद आणि जसवीर ग्रोव्हर या तिघांची अखिल भारतीय फुटबॉल महासंघाच्या कनिष्ठ राष्ट्रीय प्रशिक्षण कॅम्पसाठी निवड झाली आहे. ही निवड प्रतिष्ठित **डॉ. बी.सी. रॉय ट्रॉफी (ज्युनियर बॉईज नॅशनल स्पर्धा)**साठी महाराष्ट्र संघाच्या तयारीचा भाग आहे.

या खेळाडूंनी नोव्हेंबर 2024 मध्ये पार पडलेल्या राज्य अजिंक्यपद स्पर्धेत धमाकेदार कामगिरी करत संघाला उपांत्य फेरीपर्यंत पोहोचवलं. त्यांनी छत्रपती संभाजीनगर, नाशिक, नागपूरसारख्या तगड्या संघांचा पराभव करत राज्यभरात आपल्या खेळाची छाप पाडली.

कृष्णराज आणि भानुदास हे आठरे पाटील पब्लिक स्कूलचे, तर जसवीर ग्रोव्हर तक्षिला स्कूलचा विद्यार्थी आहे. आता हे तिघं मुंबईतील कूपरेज मैदानावर होणाऱ्या कॅम्पमध्ये भाग घेणार आहेत, जिथे त्यांना आधुनिक ट्रेनिंग, तांत्रिक कौशल्य, आणि अनुभवी प्रशिक्षकांचे मार्गदर्शन मिळणार आहे.

जिल्हा फुटबॉल संघटनेचे सचिव रौनप फर्नांडिस यांनी सांगितले, “ही निवड म्हणजे केवळ खेळाडूंची नाही, तर संपूर्ण जिल्ह्याची शान आहे. हे यश त्यांच्या मेहनतीचं, प्रशिक्षक आणि पालकांच्या पाठबळाचं, आणि संघटनेच्या सातत्यपूर्ण प्रयत्नांचं फळ आहे.”

त्यांच्या यशाबद्दल अध्यक्ष नरेंद्र फिरोदिया, उपाध्यक्ष मनोज वाळवेकर, प्रशिक्षक जेव्हिअर स्वामी आणि संघ व्यवस्थापक वैभव मनोदिया यांच्यासह अनेकांनी अभिनंदन आणि पुढील वाटचालीसाठी शुभेच्छा दिल्या.