💼 “उद्योजकतेला गती, योजनांना निधी हवीच!

चर्मकार समाजाच्या हक्कासाठी शिवाजी साळवे यांचा ठोस आवाज!

Last updated Jul 30, 2025

💼 “उद्योजकतेला गती, योजनांना निधी हवीच! – चर्मकार समाजाच्या हक्कासाठी शिवाजी साळवे यांचा ठोस आवाज!”

📍 नगर प्रतिनिधी – चर्मकार समाजाच्या हक्कांच्या प्रश्नांवर आता आवाज बुलंद होतोय! चर्मकार संघर्ष समितीचे संस्थापक अध्यक्ष शिवाजी साळवे यांच्या नेतृत्वाखाली उपमुख्यमंत्री ना. अजितदादा पवार यांना सविस्तर निवेदन देण्यात आले. या निवेदनात समाजातील युवकांना व्यवसायासाठी लागणाऱ्या निधीपासून ते कल्याणकारी योजनांच्या अंमलबजावणीपर्यंत महत्त्वाच्या मागण्या मांडण्यात आल्या.

राज्य शासनाने चर्मकार समाजातील होतकरू व्यावसायिकांसाठी 1,000 कोटींचा निधी जाहीर केला असला तरी वास्तवात त्या रकमेचा लाभ लाभार्थ्यांपर्यंत पोहोचत नाही, ही गंभीर बाब शिवाजी साळवे यांनी अधोरेखित केली. अनेक लाभार्थ्यांची कर्ज प्रकरणे मंजूर होऊनही त्यांना धनादेश मिळत नाहीत. योजना आहेत, पण निधी नाही – यामुळे समाजातील खऱ्या लाभार्थ्यांचे भवितव्य अंधारात आहे, अशी चिंता त्यांनी व्यक्त केली.

मुख्य मागण्या –
✅ व्यावसायिकांसाठी असलेला निधी तातडीने दुप्पट करावा
✅ मंजूर कर्जांचे धनादेश एका महिन्यात देण्यात यावेत
✅ 2019 ते 2024 दरम्यानच्या व्याजाची माफी मिळावी
✅ विविध कल्याणकारी योजनांसाठी स्वतंत्र निधी द्यावा

कोरोनाकाळात समाजातील अनेक व्यावसायिकांचे उद्योग बंद पडले. यासाठी शासनाने हात पुढे करून त्यांना मदतीचा आधार द्यावा, अशी स्पष्ट भूमिका चर्मकार संघर्ष समितीने घेतली आहे.

शिवाजी साळवे यांच्या मते, “योजना कागदावर नको, त्या जमिनीवर उतरल्या पाहिजेत! समाजाच्या विकासासाठी निधी मिळालाच पाहिजे – हे आमचे मुख्य उद्दिष्ट आहे.”
उपमुख्यमंत्री अजितदादा पवार यांनी या मागण्या सकारात्मकपणे घेतल्या असून, संबंधित खात्याशी लवकरच चर्चा होणार आहे.