🚨 संगमनेर शहरात मंगळसूत्र चोरांचा धुमाकूळ सुरूच!

महिलांच्या गळ्यातील मंगळसूत्र चोरणाऱ्या टोळीने अक्षरशः शहरात दहशत माजवली आहे.

Last updated Aug 20, 2025

संगमनेर LIVE अपडेट!

संगमनेर शहरात मंगळसूत्र चोरांचा धुमाकूळ सुरूच!

महिलांच्या गळ्यातील मंगळसूत्र चोरणाऱ्या टोळीने अक्षरशः शहरात दहशत माजवली आहे. दिवसाढवळ्या लोकवस्तीच्या भागात घडणाऱ्या या चोरीच्या घटनांमुळे नागरिकांमध्ये मोठी भीती पसरली आहे.

नुकतीच घडलेली ताजी घटना गोविंद नगर परिसरात झाली. सुवर्णा रमेश काळे या महिला किराणा सामान घेऊन घरी जात असताना गोल्डन सिटीसमोरील कमानीजवळ एक अनोळखी चोरटा त्यांच्या पाठीमागून आला. चक्क रस्त्याच्या मध्यभागी त्याने महिलेचे तोंड दाबून गळ्यातील मंगळसूत्र खेचले आणि पळ काढला!

यामध्ये 12 ग्रॅम वजनाचे सोन्याचे गंठण आणि त्याला लावलेले 30 ग्रॅम वजनाचे चांदीचे शिवलिंग असा दागिन्यांचा मुद्देमाल चोरट्यांनी हिसकावला आहे.

या घटनेत विशेष म्हणजे – चोरीनंतर आरोपी एकटाच पळाला नाही तर त्याचा साथीदार मोटरसायकलवर आधीच तयार बसलेला होता. चोरी केल्यानंतर लगेचच तो त्या साथीदारासोबत बाइकवर बसला आणि दोघेही पळून गेले!

या घटनेचे CCTV फुटेज पोलिसांच्या हाती लागले असून, त्यावरून या टोळीचा शोध सुरू आहे. दरम्यान, पीडित सुवर्णा काळे यांनी संगमनेर शहर पोलीस ठाण्यात तक्रार नोंदवली असून गुन्हा दाखल करण्यात आला आहे.

गेल्या काही दिवसांत संगमनेर शहरात मंगळसूत्र चोरीच्या घटना सलग घडताना दिसत आहेत. नागरिकांच्या सुरक्षिततेवर प्रश्नचिन्ह उभे राहिले असून, महिलांमध्ये भीतीचे वातावरण निर्माण झाले आहे. शहरातील मुख्य रस्ते, बाजारपेठा आणि वर्दळीच्या ठिकाणी या टोळ्यांचा वावर दिसत असल्याने पोलीस प्रशासनावर प्रश्नचिन्ह निर्माण झाले आहे.

पोलीस सूत्रांच्या माहितीनुसार, ही टोळी अत्यंत नियोजनबद्ध पद्धतीने काम करते. एक जण बळी शोधतो, दुसरा थेट हल्ला करून दागिना खेचतो आणि तिसरा साथीदार मोटरसायकलवर बसून दोघांना पळवून नेतो.