कामगाराच्या मृत्यूवर संतापाचा स्फोट! मृतदेहाची पळवापळवी, कुटुंबीयांचा आक्रोश, कामगार संतप्त!

पिंपरी चिंचवडमधील एक्साइड इंडस्ट्रीज या कंपनीतील बेमुदत संपादरम्यान धक्कादायक घटना घडली. संपात सहभागी असलेल्या कामगार विलास पोळ (वय 55) यांचा हृदयविकाराने मृत्यू झाला. मात्र त्यानंतर पोलिसांनी केलेल्या मृतदेहाच्या पळवापळवीमुळे संतापाची लाट उसळली आहे.

मृत पोळ यांच्या कुटुंबीयांचा आग्रह होता की मृतदेह थेट कंपनीसमोरील संपस्थळी नेण्यात यावा. पण पोलिसांनी प्रथम मृतदेह वायसीएम रुग्णालयातून घरी नेला, त्यानंतर पुन्हा शवागृहात परत नेला. या पळवापळवीमुळे कुटुंबीय, नातेवाईक आणि कामगारांनी संताप व्यक्त केला.

२५ ऑगस्टपासून २६५ कामगारांनी बेमुदत संप पुकारला होता. त्यानंतर लगेचच दुसऱ्या दिवशी ही घटना घडली. यामुळे संपस्थळी प्रचंड तणाव निर्माण झाला.

कुटुंबीयांची मागणी

• मृत कामगाराचा मुलगा प्रथम याला कंपनीत नोकरीत सामावून घ्यावे.

• वडिलांची वेतनश्रेणी लागू करावी.

• योग्य नुकसानभरपाई द्यावी.

दरम्यान, माजी आमदार गौतम चाबुकस्वार, कामगार नेते कैलास कदम, यशवंत भोसले, रिपाई नेत्या चंद्रकांता सोनकांबळे, संपत वाघोले यांच्यासह अनेकांनी वायसीएम रुग्णालयात धडक देत निषेध व्यक्त केला.

मृत कामगाराची मुलगी वैष्णवी हिने संतापाने सांगितले –
“वडीलच आमच्या घराचा आधार होते. दोन आठवड्यांपूर्वी माझा साखरपुडा झाला. भाऊ बेरोजगार आहे. कंपनी व्यवस्थापन जबाबदार आहे. भावाला नोकरी द्यावी व नुकसानभरपाई मिळावी.”

कामगार संघटनेचे सरचिटणीस गोविंद वांजळे म्हणाले –
“कंपनीने संपात सहभागी झाल्यास कारवाईची नोटीस दिल्यामुळे पोळ तणावाखाली होते. त्यामुळेच संपस्थळी त्यांना हार्ट अटॅक आला.”

दरम्यान, कंपनी व्यवस्थापन, पोळ कुटुंबीय आणि पोलिसांमध्ये बैठक झाली. त्यानंतर कंपनीने लेखी आश्वासन दिले की भविष्यात रिक्त जागा उपलब्ध झाल्यास प्रथम याला नोकरी दिली जाईल, वयाची अटही शिथिल केली जाईल.

शेवटी मृतदेह मूळगाव परिचे (ता. पुरंदर) येथे नेण्यात आला आणि अंत्यसंस्कार पार पडले.

पोलिसांची भूमिका आणि कंपनी व्यवस्थापनावर आरोप होत असल्याने परिसरात अजूनही तणावाचे वातावरण आहे. कामगार मात्र ठाम आहेत की न्याय मिळाल्याशिवाय लढा थांबणार नाही!