डिग्री लपवू नका, अभिमान बाळगा – चंद्रपुरात काँग्रेसचे अनोखे आंदोलन चर्चेत!

चंद्रपूर : (२९ ऑगस्ट २०२५)
आजच्या स्पर्धेच्या आणि राजकारणाच्या काळात अनेक जण आपली खरी शैक्षणिक डिग्री लपवण्याचा प्रयत्न करताना दिसतात. पण शिक्षण हे व्यक्तीचे सामर्थ्य आहे, ओळखीचा सन्मान आहे आणि समाजातील अभिमान आहे, हे अधोरेखित करण्यासाठी चंद्रपूर शहर जिल्हा काँग्रेस कमिटीने गिरणार चौकात ‘मेरी डिग्री, मेरा अभिमान’ या भन्नाट आंदोलनाचे आयोजन केले. 

या आंदोलनात काँग्रेसचे पदाधिकारी व कार्यकर्ते आपल्या-आपल्या डिग्री हातात घेऊन “शिक्षणाचा सन्मान करा, डिग्री लपवू नका” असे जोरदार नारे देत उपस्थित राहिले.  या उपक्रमाचा संदेश अगदी स्पष्ट होता – शिक्षणाबद्दल अभिमान बाळगा, कारण डिग्री ही केवळ कागदाची चिठ्ठी नसून व्यक्तीच्या मेहनतीचा, त्यागाचा आणि यशाचा पुरावा आहे. 

काँग्रेस जिल्हाध्यक्ष रितेश (रामू) तिवारी यांनी या आंदोलनात बोलताना सांगितले की, आज देशात स्वतःची डिग्री लपविण्याची प्रवृत्ती धोकादायक आहे. यामुळे सुशिक्षितांमध्ये नैराश्य वाढत आहे. अशा पार्श्वभूमीवर आम्ही हा उपक्रम हाती घेतला आहे. शिक्षणाचा अभिमान बाळगणाऱ्या प्रत्येकाला समाजात आणि राजकारणात सन्मान मिळायलाच हवा. 

यावेळी माजी जिल्हाध्यक्ष विनायक बांगडे, प्रदेश काँग्रेस कमिटीचे सचिव शिवा राव, वरिष्ठ नेते के. के. सिंग, युवक काँग्रेस विधानसभा अध्यक्ष राजेश अडूर, तसेच अनिरुद्ध वनकर, रामकृष्ण कोंड्रा, शिरीष गोगुलवार, अख्तर सिद्धिकी, नौशाद शेख, रमिश शेख आणि असंख्य सुशिक्षित कार्यकर्त्यांची मोठ्या संख्येने उपस्थिती होती. 

 आंदोलनाचे दृश्य खूपच वेगळे होते – हातात डिग्री घेऊन उभे असलेले कार्यकर्ते, त्यांच्या चेहऱ्यावरचा आत्मविश्वास आणि घोषणाबाजीमुळे गिरणार चौकात एक वेगळाच उत्साह दिसून आला. हे आंदोलन तरुण पिढीसाठी एक प्रेरणा ठरत आहे की, शिक्षणाची कधीही लाज बाळगू नका, उलट त्याचा अभिमान बाळगा! 

 या आंदोलनातून काँग्रेसने दिलेला संदेश अगदी टोकदार होता –

• डिग्री म्हणजे फक्त नोकरी मिळवण्याचे साधन नाही, ती तुमच्या कष्टांची ओळख आहे.

• समाजात शिक्षणाचा सन्मान होणे गरजेचे आहे.

• राजकारणात सुशिक्षितांना पुढे आणणे हेच राष्ट्रनिर्मितीसाठी आवश्यक आहे.

 सोशल मीडियावर याची चर्चा सुरू झाली असून #MeriDegreeMeraAbhiman हा हॅशटॅग ट्रेंड होतो आहे. विद्यार्थी, युवक आणि सुशिक्षित वर्गातून या उपक्रमाचे कौतुक होत आहे.

 Metro News Special  चंद्रपूरातील हे आंदोलन केवळ एक राजकीय उपक्रम नसून, शिक्षणाचा सन्मान करण्याचा समाजाला दिलेला एक जबरदस्त संदेश आहे.