BIG DAIRY NEWS | अकोलेच्या शितल नाईकवाडींचा दणका!

अकोले तालुक्यातील दुग्ध व्यवसायात महिलांनीही मोठी झेप घेतली आहे याचे जिवंत उदाहरण म्हणजे सौ. शितल मिलिंद नाईकवाडी . अमृतसागर सहकारी दूध व्यवसायिक व प्रक्रिया संघ, अकोले यांच्या वार्षिक अहवालात वैयक्तिक दूध उत्पादकांत तिसरा क्रमांक पटकावून त्यांनी तालुक्याचे नाव अभिमानाने उंचावले आहे.

शितलताईंनी तब्बल 1,44,572 लिटर दूध उत्पादन करून हा मानाचा सन्मान मिळवला. या उत्कृष्ट कामगिरीबद्दल अमृतसागर दूध संघाच्या वार्षिक सभेत चेअरमन वैभवराव पिचड, उपाध्यक्ष रावसाहेब वाकचौरे, मुख्य कार्यकारी अधिकारी दादाभाऊ सावंत, संचालक गंगाधर नाईकवाडी, जगन देशमुख, आप्पासाहेब आवारी, दयानंद वैद्य आदी मान्यवरांच्या हस्ते त्यांचा सन्मान करण्यात आला.

यावेळी नाईकवाडी कुटुंबासोबतच श्रीदत्त दूध संस्थेचे चेअरमन दिनकर जाधव, संदीप भोर, मधुकर भोर, गणेश कोटकर, डॉ. विशाल आरोटे, सत्यम भोर, दत्तू भोर, राजेंद्र वाळुंज, गोरख मालुंजकर, सयाजी पोखरकर आदी मान्यवर उपस्थित होते.

शितल नाईकवाडींच्या यशाची खरी कहाणी “ओम साई काऊ फार्म, अंबड” पासून सुरू झाली. 2017 साली फक्त 6 गाईंपासून सुरुवात झालेला हा प्रवास आज तब्बल 38 गाईंमध्ये परिवर्तित झाला आहे. आज हा गोठा अकोल्यातील पश्‍चिम भागात सर्वात मोठा व तालुक्यात तिसऱ्या क्रमांकाचा मुक्त संचार गोठा ठरला आहे.

व्यवसायात असूनही शितल नाईकवाडी स्वतः शिक्षिका आहेत तर त्यांचे पती मिलिंद नाईकवाडी बांधकाम व्यावसायिक. दोघांनीही आपल्या मेहनतीने व नियोजनबद्ध पद्धतीने हा व्यवसाय उभा केला आहे. रोज सकाळी 4 ते 7 आणि संध्याकाळी 4 ते 7 अशा वेळेत फक्त दोन मजुरांसह संपूर्ण गोठ्याचे नियोजन चालवले जाते. इतक्या काटेकोरपणे व्यवस्थापन केल्यामुळेच हे यश मिळवणे शक्य झाले आहे.

महिलादेखील दुग्ध व्यवसायात पुरुषांच्या बरोबरीने यश मिळवू शकतात हे दाखवून देणारे शितल नाईकवाडींचे हे यश खरंच सर्वांसाठी प्रेरणादायी आहे. त्यांच्या या झेपेमुळे अकोले तालुक्यात महिलांचे योगदान अधिक ठळक झाले आहे.

आगामी काळात शितलताई आणि मिलिंदराव यांचा निश्‍चय आणखी मोठा – तालुक्यात पहिला क्रमांक मिळवायचाच!

त्यांच्या या यशाबद्दल सर्व स्तरांतून हार्दिक शुभेच्छा आणि अभिनंदनाचा वर्षाव होत आहे.

मित्रांनो, अशी यशोगाथा आपल्याला प्रेरणा देते.
#WomenPower #DairySuccess #Akole #MetroNews