मतदारयादी घोळ प्रकरणात सीएसडीएस प्रमुख संजय कुमार अडचणीत!

 मतदारयादी घोळ प्रकरणात सीएसडीएस प्रमुख संजय कुमार अडचणीत!

 नाशिक-नागपूरात गुन्हा दाखल, वादग्रस्त पोस्ट डिलिट करून मागितली माफी

मुंबई :
देशातील नामांकित संशोधन संस्था सीएसडीएसचे प्रमुख संजय कुमार मोठ्या अडचणीत सापडले आहेत. महाराष्ट्रातील मतदारयाद्यांमध्ये मोठा घोळ असल्याचा दावा त्यांनी सोशल मीडियावर करताच प्रचंड वादंग उडाला. आता नाशिक आणि नागपूर येथे त्यांच्या विरोधात थेट गुन्हा दाखल करण्यात आला आहे.

 नेमकं प्रकरण काय?
संजय कुमार यांनी 17 ऑगस्ट रोजी केलेल्या ट्विटमध्ये “2024 लोकसभा आणि विधानसभा निवडणुकीदरम्यान मतदारसंख्या अवास्तव वाढली” असा दावा केला होता.
 नाशिक पश्चिम मतदारसंघात मतदारांची संख्या 47% ने वाढली,
 हिंगणा मतदारसंघात 43% वाढ झाली – असा आरोप त्यांनी केला.

या दाव्याला निवडणूक आयोगाने खोटी व दिशाभूल करणारी माहिती असल्याचं म्हटलं. रामटेक तहसीलदारांनी तक्रार दाखल केली आणि त्यानुसार पोलिसांनी गुन्हा नोंदवला. नाशिक जिल्हा प्रशासनानेही “देवळाली विधानसभा मतदारसंघाबाबत चुकीची माहिती पसरवली” असा ठपका ठेवला.

 त्यामुळे आता संजय कुमार यांची अडचण वाढली असून, या प्रकरणाचा फॉलोअप जोरात सुरू आहे.

 माफी मागावी लागली
वाद पेटल्यावर संजय कुमार यांनी आपली पोस्ट डिलिट केली आणि खुलासाही दिला –
“2024 च्या लोकसभा आणि विधानसभा निवडणुकीच्या डेटाची तुलना करताना आमच्याकडून चूक झाली. चुकीची माहिती पसरवण्याचा हेतू नव्हता. आमच्या टीमकडून अभ्यासात गफलत झाली,” असं त्यांनी सांगितलं.

पण तरीही निवडणूक आयोगाने कठोर भूमिका घेतली असून, गुन्हा दाखल झाल्यानं आता कायदेशीर अडचणीतून बाहेर पडणं सोपं नाही असं म्हटलं जात आहे.

 सोशल मीडियावरही या प्रकरणाची जोरदार चर्चा सुरू असून, “मतदारयादीत घोळ आहे का?” हा प्रश्न पुन्हा एकदा चर्चेत आला आहे.