शहरात भटक्या कुत्र्यांचा दहशतीचा कहर! लहान मुलांवर झुंडीने हल्ले, नागरिक संतप्त!

अमळनेर शहरात गेल्या काही दिवसांपासून भटक्या कुत्र्यांचा उच्छाद प्रचंड वाढला आहे. रस्त्यांवर मुक्तपणे फिरणारे हे कुत्रे फक्त वाहतुकीला अडथळा ठरत नाहीत तर नागरिकांच्या जिवावरही बेतत आहेत. दोन दिवसांतच अनेक ठिकाणी झुंडीने हल्ला करून लहान मुलांना जखमी करण्याच्या घटना समोर आल्या आहेत. यामुळे परिसरातील पालकांमध्ये प्रचंड भीतीचे वातावरण पसरले आहे.

वृद्ध नागरिकही सुरक्षित नाहीत! कॉलनी परिसरात बाहेर फिरताना अचानक कुत्र्यांचे टोळके हल्ला करत असल्याने लोक भयभीत झाले आहेत.

नगरपरिषदेकडून काय चाललंय?
नागरिकांनी वारंवार तक्रारी करून कारवाईची मागणी केली. खरं तर नगरपरिषदेनं या मोकाट जनावरांवर नियंत्रण ठेवण्यासाठी नसबंदी मोहिम सुरू केली होती. पण धक्कादायक म्हणजे काही प्राणीप्रेमी संघटनांच्या विरोधामुळे हे काम थांबवण्यात आले आहे!

मुख्याधिकारी तुषार नेरकर यांनी याबाबत कबुली दिली की, “काही प्राणीप्रेमींच्या आक्षेपांमुळे निर्बीजीकरणाचे काम रोखण्यात आले.”

नागरिक मात्र संतापले आहेत. त्यांचे म्हणणे आहे की,
प्राण्यांवर प्रेम करणे चांगले, पण नागरिकांच्या जीवितापेक्षा प्राणीप्रेम मोठं कसं?
शहरातील मुलं-जुने लोक हल्ल्यात जखमी होत असताना ही प्राणीमित्र संघटना गप्प का?
भटक्या कुत्र्यांचा बंदोबस्त करून नागरिकांना दिलासा द्या!

परिस्थिती इतकी गंभीर झाली आहे की, शहरातील प्रत्येक कॉलनीत भीतीचं वातावरण आहे. पालक मुलांना एकटे बाहेर पाठवायला धजावत नाहीत. शाळेत जाताना, खेळायला बाहेर पडताना मुलांना टोळक्या-टोळक्याने कुत्र्यांनी वेढून टाकल्याच्या घटना रोज घडत आहेत.

सोशल मीडियावरही नागरिकांचा रोष ओसंडून वाहतोय.
“ आम्ही प्राण्यांविरोधात नाही, पण आमच्या मुलांच्या जीविताशी खेळू नका!” – अशी मागणी जोर धरते आहे.

त्यामुळे आता प्रश्न असा की, नगरपरिषद आणि प्रशासन प्राणीप्रेमींच्या दबावाला झुकणार की नागरिकांच्या सुरक्षेसाठी ठोस कारवाई करणार?

मेट्रो न्यूज पोर्टलचं मत :
भटक्या कुत्र्यांचा प्रश्न हा केवळ प्राण्यांबद्दल नाही तर मानवी सुरक्षेचा आहे. नागरिकांच्या जीवाची किंमत सर्वात आधी विचारात घेतली पाहिजे. प्रशासनानं तात्काळ उपाययोजना करून शहराला या कुत्र्यांच्या दहशतीतून मुक्त करावं, अशीच अपेक्षा!