🌧️ शेतकऱ्यांना दिलासा! मुख्यमंत्री फडणवीसांची मोठी घोषणा 🚜💰

"राज्यातील सगळ्या शेतकऱ्यांना नुकसानभरपाई दिली जाणार!"

Last updated Aug 21, 2025

शेतकऱ्यांना दिलासा! मुख्यमंत्री फडणवीसांची मोठी घोषणा

राज्यात गेल्या काही दिवसांपासून मुसळधार पावसाने थैमान घातलंय. नद्या दुथडी भरून वाहतायत, गावं पाण्याखाली जातायत, आणि सगळ्यात मोठा फटका बसलाय आपल्या शेतकऱ्यांना. मेहनतीने उभी केलेली पिकं क्षणात पाण्याच्या लाटेत वाहून गेली, बांध फुटले, 14 लाख एकरांवरील पिकं नष्ट झालीत. शेतकऱ्यांच्या डोळ्यातलं पाणी पाहून प्रत्येकाचं हृदय पिळवटून निघालंय.

पण आज शेतकऱ्यांसाठी मोठी दिलासादायक बातमी आलीय! मुख्यमंत्री देवेंद्र फडणवीस यांनी स्पष्ट शब्दांत सांगितलंय – “राज्यातील सगळ्या शेतकऱ्यांना नुकसानभरपाई दिली जाणार!”

पुण्यात पत्रकारांशी बोलताना मुख्यमंत्र्यांनी सांगितलं की, पंचनामे करून सर्व शेतकऱ्यांना मदत पोहोचवली जाईल. चार दिवसांत मदत दिली जाईल. सरकार शेतकऱ्यांच्या पाठीशी आहे आणि कोणालाही वंचित ठेवलं जाणार नाही.

सध्या अजून काही भागात रेड अलर्ट जाहीर आहे. नद्या धोक्याच्या पातळीवरून वाहतायत. एनडीआरएफ आणि आपत्ती व्यवस्थापन यंत्रणा युद्धपातळीवर काम करतायत. धरणातून विसर्ग सुरू असल्याने नदीकाठच्या गावांना सतत इशारे देण्यात येतायत आणि नागरिकांचं सुरक्षित ठिकाणी स्थलांतरही सुरू आहे.

शेतकऱ्यांनी घाम गाळून उभं केलेलं पीक पाण्यात गेलं, पण सरकारने वेळीच केलेल्या या घोषणेमुळे शेतकरी पुन्हा उभा राहील, अशी आशा आहे.

दरम्यान, पुण्यात पत्रकारांनी ठाकरे बंधूंच्या बेस्ट पतपेढी निवडणुकीतील पराभवाबद्दल प्रश्न विचारला असता, फडणवीस म्हणाले – “आम्ही कधीच राजकारण केलं नाही, पण ठाकरे बंधूंनी त्याचं राजकारण केलं. लोकांना हे आवडलं नाही असं दिसतंय.”