एमआयडीसीतील कामगारांच्या हक्कांसाठी शिवसेनेचा आवाज बुलंद! 

 

उद्योगमंत्री उदय सामंत यांना निवेदन – मूलभूत सुविधा, सुरक्षा आणि कायमस्वरूपी रोजगाराची मागणी

 अहिल्यानगर (प्रतिनिधी):
अहिल्यानगर एमआयडीसीतील कामगारांचे आवाज अखेर सरकारपर्यंत पोहोचले आहेत! 
शिवसेना (उद्धव बाळासाहेब ठाकरे गट) अनुसूचित जाती विभागाचे शहर प्रमुख विनोद साळवे यांनी राज्याचे उद्योगमंत्री ना. उदय सामंत यांची संगमनेर येथे भेट घेत कामगारांच्या जीवनाशी निगडित गंभीर प्रश्नांवर ठाम भूमिका मांडली.

 साळवे यांनी उद्योगमंत्र्यांना दिलेल्या निवेदनात म्हटलं आहे की,
अहिल्यानगर एमआयडीसी हा जिल्ह्याच्या औद्योगिक विकासाचा कणा आहे. हजारो कामगार येथे दिवस-रात्र परिश्रम करत आहेत. परंतु, त्यांच्या मूलभूत सुविधा, वैद्यकीय सेवा, सुरक्षित कामाचे वातावरण आणि कायमस्वरूपी रोजगार या बाबतीत परिस्थिती अत्यंत दयनीय आहे.

 अनेक कारखान्यांमध्ये कामगारांना किमान वेतन मिळत नाही, तर काही ठिकाणी आरोग्यविषयक सुविधा पूर्णपणे अनुपस्थित आहेत. सुरक्षेचे नियम पाळले जात नाहीत, आणि अपघातानंतर जबाबदारी टाळली जाते, असे साळवे यांनी ठणकावले.

यावेळी आमदार अमोल खताळ, जिल्हाप्रमुख बाबुशेठ टायरवाले, अनुसूचित जाती विभागाचे जिल्हाप्रमुख किशोर वाघमारे, तसेच रावसाहेब काळे पाटील यांच्यासह शिवसेनेचे अनेक पदाधिकारी उपस्थित होते. 

 साळवे म्हणाले –

“एमआयडीसीत काम करणारे कामगार हेच या उद्योगविश्वाचे खरे आधारस्तंभ आहेत. त्यांचे जीवनमान उंचावल्याशिवाय प्रगती अशक्य आहे. शासनाने त्यांच्या हक्कांसाठी ठोस आणि तातडीने उपाययोजना केल्या पाहिजेत!”

या भेटीला उद्योगमंत्री उदय सामंत यांनीही सकारात्मक प्रतिसाद दिला 
त्यांनी संबंधित अधिकाऱ्यांना अहिल्यानगर एमआयडीसीचा प्रत्यक्ष अहवाल सादर करण्याचे आदेश दिले असून, कामगारांच्या प्रश्नांवर लवकरच कार्यवाही करण्यात येईल, अशी खात्री दिली आहे.

 साळवे यांनी पुढे सांगितले की,
राज्य सरकारने “कामगार सुरक्षा, स्थैर्य आणि सन्मान” या तत्त्वावर कार्य करायला हवे.
कारखानदार आणि प्रशासन यांच्यातील जबाबदारीची साखळी मजबूत केली तरच कामगारांना न्याय मिळेल.

 “कामगारांच्या आवाजाला योग्य न्याय मिळवून देण्यासाठी आमचा लढा सुरूच राहील,” असं साळवे यांनी ठामपणे सांगितलं.