ठाकरेंच्या दिल्ली दौऱ्यास आजपासून सुरवात

शिवसेना (उबाठा) पक्षप्रमुख उद्धव ठाकरे हे आजपासून तीन दिवसांच्या दिल्ली दौऱ्यावर जाणार आहेत. त्यांच्याबरोबर आदित्य ठाकरे आणि रश्मी ठाकरेही असतील, अशी माहिती खासदार संजय राऊत यांनी दिली. लोकसभा निवडणुकीमध्ये महाविकास आघाडीला मिळालेल्या यशानंतर उद्धव ठाकरे प्रथमच दिल्लीला जाणार आहे. या दौऱ्यात ते काँग्रेसचे अध्यक्ष मल्लिकार्जुन खर्गे, राहुल गांधी, सोनिया गांधी यांच्यासह दिल्लीत असणाऱ्या महाराष्ट्रातील अनेक नेत्यांच्या भेट घेतील. महाविकास आघाडीमध्ये विधानसभा जागा वाटपाच्या बैठकांना सुरुवात होण्यापूर्वी ठाकरे आणि गांधी कुटुंबीयांची भेट महत्त्वाची ठरणार आहे. तसेच अर्थसंकल्पीय अधिवेशन सुरू असल्याने ‘इंडिया’ आघाडीतील प्रमुख नेत्यांच्याही भेटीही ठाकरे घेणार आहेत. उद्धव ठाकरे आणि शरद पवार यांचीही भेट होईल,अशी माहिती संजय राऊत यांनी दिली.